سال 2021 پاکستان میں کرکٹ کے حوالے سے خوشخبریوں کا سال بن رہا ہے۔ پاکستان کرکٹ بورڈ کے مطابق پاکستان آئندہ برس چار غیر ملکی ٹیموں کی میزبانی کرے گا۔
پی سی بی کے مطابق پاکستان کرکٹ ٹیم آئندہ برس جن چار ممالک کی ٹیموں کے خلاف ہوم سیریز کھیلے گی ان میں جنوبی افریقا، انگلینڈ، نیوزی لینڈ اور ویسٹ انڈیز شامل ہیں۔
چار غیر ملکی ٹیموں کی متوقع پاکستان آمد کے پیش نظر بورڈ نے ابتدائی تیاریوں کا آغاز کردیا ہے۔
پی سی بی نے چاروں ہوم سیریز میں ٹیم کے لئیے اسپانسرز پارٹنرشپ رائٹس کے لیےاشتہارات جاری کردئیے ہیں۔ کوویڈ 19 کے حالات میں سینی ٹائزیشن اور ہائی جین پارٹنررائٹس کے لئیے بھی پیشکشیں مانگی گئی ہیں۔
پی سی بی نے ہوم سیریز کے پارٹنر شپ رائٹس کے ساتھ سیریز ٹائٹل پارٹنر شپ، سیریز پریزنٹنگ اورکٹگری پارٹنرشپ رائٹس کے لیے بھی اشتہار دیا گیا ہے۔ ریڈیو اور آڈیو اسٹریمنگ کے علاوہ وائرلیس موبائل ٹیلی فون رائٹس کے لئیے بھی خواہشمند پارٹیوں سے پیشکش طلب کی گئی ہیں۔ پیشکشیں جمع کروانے کی آخری تاریخ اٹھائیس دسمبر رکھی گئی ہے۔
واضح رہے کہ پاکستان کی پہلی سیریز جنوبی افریقہ کے ساتھ طے ہیں۔ جنوری، فروری میں دو ٹیسٹ اور تین ٹی ٹونٹی میچز کراچی راولپنڈی اور لاہور میں شیڈول ہیں۔
