لاہور: جنوبی افریقہ نے ڈیوین پریٹوریس کی عمدہ باؤلنگ اور بلے بازوں کی شاندار کارکردگی کی بدولت پاکستان کو دوسرے ٹی20 میچ میں باآسانی 6وکٹوں سے شکست دے دی۔
قذافی اسٹیڈیم میں کھیلے گئے سیریز کے دوسرے میچ میں جنوبی افریقہ نے ٹاس جیت کر پہلے بالنگ کا فیصلہ کیا دوسرے ہی اوور میں کپتان بابر اعظم صرف 5رنز بنا کر پویلین لوٹ گئے۔
حیدر علی نے محمد رضوان کے ساتھ مل کر اسکور کو 36 تک پہنچایا جس کے بعد ان کی 10رنز کی اننگز بھی اختتام کو پہنچی جبکہ حسین طلعت پھر ناکامی سے دوچار ہو کر تین رنز بنانے کے بعد چلتے بنے۔
گزشتہ میچ میں سنچری بنانے والے رضوان نے ایک مرتبہ پھر عمدہ کھیل پیش کرتے ہوئے نصف سنچری مکمل کی۔قومی ٹیم سنچری مکمل ہونے سے کچھ دیر قبل رضوان کی خدمات سے بھی محروم ہو گئی جو 41 گیندوں پر 6 چوکوں اور ایک چھکے کی مدد سے 51 رنز بنانے کے بعد آؤٹ ہو گئے۔
خوشدل شاہ اور فہیم اشرف نے سکور کو 126 تک پہنچایا جس کے بعد 18 گیندوں پر 15 رنز بنانے والے خوشدل ڈیوین پریٹوریس کی وکٹ بن گئے اور پھر جنوبی افریقی بالر نے نواز کو آؤٹ کر کے اپنی پانچویں وکٹ حاصل کی۔
فہیم اشرف نے اختتامی اوورز میں جارحانہ بیٹنگ کرتے ہوئے پاکستان کی معقول مجموعے تک رسائی میں اہم کردار ادا کیا اور 12 گیندوں پر دو چھکوں اور دو چوکوں کی مدد سے 30رنز بنائے۔
پاکستان نے مقررہ اوورز میں 7 وکٹوں کے نقصان پر 144 رنز بنائے، پریٹوریس پانچ وکٹیں لے کر سب سے کامیاب باؤلر رہے۔
ہدف کے تعاقب میں اننگز کی دوسری ہی گیند پر شاہین شاہ آفریدی نے پاکستان کو کامیابی دلاتے ہوئے جینمین ملان کو چلتا کردیا۔
پاکستان کو دوسری کامیابی کے لیے بھی زیادہ انتظار نہیں کرنا پڑا اور شاہین نے جے جے اسمٹس کو آؤٹ کر کے 21 رنز پر جنوبی افریقہ کو دوسرا نقصان پہنچا۔
اس موقع پر ریزا ہینڈرکس کا ساتھ دینے پائٹ وین بلجون آئے اور دونوں کھلاڑیوں نے 53 گیندوں پر 77 رنز کی شراکت قائم کر کے اپنی ٹیم کی فتح کی بنیاد رکھی۔
98 کے مجموعی سکور پر 42 رنز بنانے واکے ہینڈرکس کی اننگز کا خاتمہ جبکہ کچھ ہی دیر بعد بلجون بھی 42 ہی رنز بنا کر نواز کی گیند پر انہی کو کیچ دے بیٹھے۔لیکن ڈیوڈ ملر اور ہنری کلاسن نے مزید کسی نقصان کے بغیر ہی اپنی ٹیم کو 22 گیندوں قبل ہدف تک رسائی دلا دی۔دونوں نے بالترتیب 25 اور 17 رنز بنائے۔
جنوبی افریقہ نے میچ میں 6 وکتوں سے کامیابی حاصل کرنے کے ساتھ ہی سیریز بھی 1-1 سے برابر کردی۔دونوں ٹیموں کے درمیان سیریز کا فیصلہ کن ٹی20 میچ کل اتوار کو کھیلا جائے گا۔
