آئی سی سی کی ون ڈے رینکنگ میں پاکستان کرکٹ ٹیم نے اپنی پوزیشن مزید مستحکم کرلی۔ ریٹنگ میں 1 پوائنٹ کے اضافے کے ساتھ قومی ٹیم چوتھے سے تیسرے نمبر پر پہنچ گئی۔
آئی سی سی کی نئی جاری کردہ رینکنگ کے مطابق آسٹریلیا کو سری لنکا کے خلاف پانچ میچوں کی سیریز کے دوسرے میچ میں شکست کے بعد رینکنگ میں تنزلی کا سامنا کرنا پڑا جس کے باعث پاکستان چوتھے سے تیسرے نمبر پر پہنچ گیا۔
پاکستان نے ویسٹ انڈیز کو ہوم گراؤنڈ پر کلین سوئپ کرکے ون ڈے رینکنگ میں بھارت سے چوتھی پوزیشن چھین لی تھی تاہم آسٹریلیا کو سری لنکا کے خلاف 26 رنز سے شکست کے بعد قومی ٹیم کی ریٹنگ میں 1 پوائنٹ کا اضافہ ہوا اور تیسری پوزیشن سنبھال لی جبکہ کینگروز 1 پوائنٹ کی کمی سے چوتھے نمبر پر آگئے۔
آئی سی سی کی تازہ رینکنگ کے مطابق نیوزی لینڈ 125 ریٹنگ کے ساتھ پہلے، انگلینڈ 124 ریٹنگ کے ہمراہ دوسرے، پاکستان 106 ریٹنگ پوائنٹس کے ساتھ تیسرے جبکہ آسٹریلیا اور بھارت 105 ریٹنگز کے ہمراہ بالترتیب چوتھی پانچویں پوزیشن پر قابض ہیں۔
قبل ازیں قومی کرکٹ ٹیم کے کپتان بابراعظم کے بعد اوپنر امام الحق نے بھی ون ڈے رینکنگ میں سابق بھارتی کپتان ویرات کوہلی کو پیچھے چھوڑتے ہوئے دوسری پوزیشن پر قبضہ جمالیا تھا۔
