قومی کرکٹ ٹیم کے سابق فاسٹ باؤلر شعیب اختر نے ‘راولپنڈی ایکسپریس’ نامی فلم کا موشن پوسٹر شیئر کرتے ہوئے اپنی زندگی پر بین الاقوامی فلم بنائے جانے کی تصدیق کردی۔
سو میل فی گھنٹہ کے برابر رفتار سے باؤلنگ کروانے والے راولپنڈی ایکسپریس شعیب اختر کو دنیا کے فاسٹ ترین باؤلر کا اعزاز حاصل ہے اور وہ اپنی شاندار باؤلنگ کی وجہ سے دنیا بھر میں مقبول ہیں۔
اس لیے اب ان کی زندگی پر ‘راولپنڈی ایکسپریس’ نامی انٹرنیشنل فلم بنائی جا رہی ہے، جو کہ پاکستان کے کسی بھی کرکٹر پر بنائی جانے والی پہلی عالمی فلم ہوگی۔
شعیب اختر نے اپنی سوشل میڈیا پوسٹ میں تصدیق کی کہ ان کی زندگی پر ‘راولپنڈی ایکسپریس’ نامی فلم بنائی جا رہی ہے، جس میں ان کی زندگی کے وہ پہلو بھی شامل ہوں گے جو کہ اب تک کسی کے سامنے نہیں آئے۔
انہوں نے سوشل میڈیا پوسٹس میں فلم کا موشن پوسٹر شیئر کرتے ہوئے بتایا کہ ان کی فلم کو کیو فلم پروڈکشن تیار کر رہا ہے اور اس کی ہدایات ایم فراز قیصر دے رہے ہیں۔
انہوں نے دعویٰ کیا کہ ‘راولپنڈی ایکسپریس’ میں وہ باتیں اور انکشافات شامل ہوں گے جو کہ آج تک راز بنے ہوئے ہیں۔
شعیب اختر نے کہا کہ لوگ یہ دعویٰ کرتے ہیں کہ وہ ان سے متعلق ہر چیز جانتے ہیں مگر ایسا نہیں اور اب ان کی زندگی پر بننے والی بائیوگرافی فلم میں سب راز سامنے آجائیں گے۔
