کولمبو: سری لنکا کے شہر کولمبو میں جاری ساوتھ ایشین کراٹے چیمپیئن شپ میں پاکستان نے چار گولڈ اور ایک سلور میڈل جیت لیا۔
ماہ گل نے منفی 61 کلو گرام کیٹیگری میں گولڈ میڈل جیتا ہے جبکہ پاکستان نے ٹیم ایونٹ میں بھارت کو ہراکر گولڈ میڈل حاصل کیا۔ ارشاد علی نے اب تک انفرادی کاتا جونیئر اور سینیئر کیٹیگری میں دو گولڈ میڈل اپنے نام کیے ہیں۔
ویمن انفرادی کاتا میں پاکستان کی آرزو نے سلور میڈل لیا ہے۔
گولڈ میڈلسٹ ارشاد علی نے سبز ہلالی پرچم بلند کرنے کو اپنے لیے ایک اعزاز قرار دیا ہے۔ ان کا کہنا ہے کہ سخت محنت کا پھل ملا ہے، اس کامیابی کے لیے کوچ کے ساتھ کراٹے فیڈریشن کے محمد جہانگیر کا بھی بہت شکرگزار ہوں جن کی وجہ سے اس چیمپیئن شپ میں شرکت کا موقع ملا۔
اس چیمپیئن شپ میں پاکستان کا 17 رکنی دستہ جونیئیر، کیڈت اور سینیئر مقابلوں میں ملک کی نمائندگی کر رہا ہے۔
