پاکستان کے خلاف پہلے ٹیسٹ سے قبل انگلینڈ کو بڑا دھچکا لگ گیا۔
ہیڈ کوچ برینڈن میک کولم نے پریس کانفرنس کے دوران بتایا کہ فاسٹ بولر مارک ووڈ انجری کے باعث یکم دسمبر سے شروع ہونے والی سیریز کے پہلے میچ سے باہر ہو گئے ہیں۔
32 سالہ کھلاڑی انگلینڈ کی T20 ورلڈ کپ کی کامیاب مہم کے دوران انجری کا شکار ہو گئےتھے جس کی وجہ سے وہ بھارت کے خلاف سیمی فائنل اور پاکستان کے خلاف فائنل نہ کھیل سکے۔
ووڈ کی انجری میں بہتری آرہی ہے اور امکان ہے کہ وہ ملتان اور کراچی میں ہونے والے آخری دو ٹیسٹ میچز کے لیے دستیاب ہوں گے۔
یاد رہے کہ انگلینڈ نے پاکستان کے سفر سے قبل ابوظہبی میں کیمپ کے دوران نوجوان لیگ اسپنر ریحان احمد کو ٹیم میں شامل کیا تھا۔ وہ دی لائنز (انگلینڈ سیکنڈ الیون) کا حصہ تھا، جس نے مرکزی اسکواڈ کے خلاف تین روزہ پریکٹس گیم کھیلی۔
