کراچی: پاکستان سپر لیگ (پی ایس ایل) کے آٹھویں سیزن میں کراچی کنگز اور پشاور زلمی کے میچ سے قبل محمد عامر نے چونکا دینے والا بیان دیا ہے۔
مقامی چینل سے بات کرتے ہوئے کراچی کنگز کے فاسٹ بولر محمد عامر نے کہا کہ میرا کام وکٹ لینا اس سے قطع نظر کون سا بلےباز کریز پر موجود ہے، خواہ وہ بابراعظم ہوں یا کوئی ٹیلنڈر! بالنگ کروانا یکساں ہے۔
انہوں نے کہا کہ میچز کے دوران کھلاڑیوں کی میدان پر دشمنی مجھے اچھی لگتی ہے، جس سے توجہ نئے چیلنجز پر مرکوز ہوجاتی ہے۔
محمد عامر نے کہا کہ لیگز میں اچھا مقابلہ دیکھنے کو ملتا ہے، صرف کنگز ہی نہیں تمام ٹیموں کے پاس کوالٹی بالرز موجود ہیں۔ انہوں نے کہا کہ پاکستان سپر لیگ ایک معیاری ٹورنامنٹ ہے اس لیے غیر ملکی کرکٹرز یہاں کھیلنا پسند کرتے ہیں۔
بابر کی زیر قیادت پشاور زلمی کی ٹیم آج کراچی کنگز کے ہوم گراؤنڈ پر مدمقابل آئے گی جبکہ میچ پاکستان وقت کے مطابق شام 7:30 بجے شروع ہوگا۔
