اکثریت ٹشو رول کو صفائی کیلئے ہی استعمال کرتی ہے، لیکن ٹشو رول صفائی کے علاوہ اپنے اندر کئی طریقوں سے استعمال ہونے کی خاصیت سموئے ہوئے ہے۔
کاغذ کے اس ٹکڑے کو صفائی کے علاوہ حیرت انگیز طریقوں سے بھی استعمال کیا جا سکتا ہے۔
سپر کرسپی چکن بنانے سے پہلے ٹشو پیپر کی مدد سے چکن کو خشک کرنا ہو یا اضافی چکنائی جذب کرنے کیلئے فرائڈ آئٹمز کو ٹشو پیپر پر رکھنا ہو، یہ کئی طریقوں سے استعمال میں لایا جاسکتا ہے۔
ٹشو کی ایک اضافی خصوصیت سبزیوں کو تازہ رکھنا بھی ہے، فریج میں رکھنے کے باوجود بھی اکثر سبزیاں بوسیدہ ہوجاتی ہیں لیکن اس نئے استعمال سے حیران کن نتائج مل سکتے ہیں۔
کسی بھی سبزی کوتازہ رکھنے کیلئے ایک باکس میں ٹشو پیپر بچھا دیں اور سبزی رکھنے کے بعد اوپر دوبارہ ٹشو پیپر بچھا دیں۔
اس کے علاوہ فریج میں ایک ٹشو رول رکھنا بھی فریج میں موجود عجیب بدبو کو ختم کردیتا ہے۔
یہ کیسے کام کرتا ہے؟
زیادہ تر پھل اور سبزیاں وقت کے ساتھ پانی چھوڑتے ہیں۔ یہ نمی کہیں نہیں جاتی اور فریج کے کرسپر باکس میں پھنس جاتی ہے۔
یہ ٹشو رولز نمی کو جذب کرتے ہیں، جس سے سبزیوں کے نرم ہونے کا عمل سست ہوجاتا ہے۔
لیکن اس رول کو مہینے میں دو بار تبدیل کرنا ضروری ہے۔
اس سے فریج میں موجود پھل اور سبزیاں جتنی خشک ہوں گی، یہ اتنی ہی دیر تک چلیں گی۔
