اسلام آباد:امریکا میں پاکستانی بزنس مین تنویر احمد نے 9ملین ڈالر (2.5بلین روپے)پاکستانی یونیورسٹی کو عطیہ کردیے۔
پاکستانی کاروباری شخصیت کی جانب سے عطیہ رقم سے نیشنل یونیورسٹی آف سائنس اینڈ ٹیکنالوجی اسلام آباد کے ضرورت مند طلبہ کو اسکالر شپ فراہم کی جائے گی۔
تنویر احمد کے عطیہ سے انڈونمنٹ فنڈز کے ذریعے ہر سال 200طلبہ اسکالرشپ حاصل کرسکیں گے،تنویر احمد کی طرف سے کیا جانے والا 9ملین ڈالر کو عطیہ کسی بھی پاکستانی یونیورسٹی کا دیا جانے والا سب سے بڑا عطیہ ہے۔
اس حوالے سے تنویر احمد نے کہا کہ اسکالرشپ کی اسکیم کو دیگر یونیورسٹیز تک بڑھانے کا ارادہ بھی ہے، آئندہ ماہ اسلام آباد میں منعقد تقریب میں اسکالر شپ اسکیم کا باقاعدہ افتتاح کیا جائے گا اور مستحق طلبہ کو اسکالرشپ میرٹ پر ہائر ایجوکیشن کمیشن کے تحت ملے گی۔
انہوں نے کہا کہ توقع ہے اسکالرشپ حاصل کرنے والے طلبہ آئی ٹی، آئی اے اور دیگر جدید شعبوں میں اپنا نام پیدا کریں گے، ان کا کہنا تھا کہ بیرون ملک آباد پاکستانی اپنے وطن کے مقروض ہیں، ہم آج جہاں ہیں اپنے وطن کی وجہ سے ہی ہیں۔
تنویر احمد نے 2022میں سیلاب زدگان کیلئے 50 ملین ڈالر سے زائد کی امداد بھی دی تھی، سیالکوٹ سے تعلق رکھنے والے تنویر احمد بطور طالب علم امریکا گئے تھے اور ریسٹورینٹ میں ملازمت سے کام شروع کیا تھا۔
