نیویارک میں حلال کھانے کا سٹال لگانے والے کو ہراساں کرنے پر سابق امریکی صدر باراک اوباما کے مشیر اور امریکی محکمہ خارجہ کے سابق عہدیدار اسٹیورٹ سیلڈووٹز کو گرفتار کر لیا گیا۔
امریکی عہدیدار پر ہراسگی، نفرت انگیز جرم اور پیچھا کرنے کے الزامات عائد کیے گئے ہیں، 64 سالہ اسٹیورٹ سیلڈووٹز سابق امریکی صدر اوباما کے مشیر رہ چکے ہیں۔
میڈیا رپورٹ کے مطابق امریکی عہدیدار نے نیویارک سٹی میں حلال کھانے کا سٹال لگانے والے شخص کو کئی بار ہراساں کیا، اسلام مخالف جملے بولے، دہشت گرد کہا اور کہا کہ غزہ میں ہزاروں فلسطینی بچوں کی اموات کافی نہیں ہیں۔
اسٹیورٹ سیلڈووٹز کی ایک ویڈیو سوشل میڈیا پر وائرل ہوئی جس میں اسٹیورٹ کھل کر مسلمانوں سے اپنی نفرت کا اظہار کر رہے تھے۔
وائرل ویڈیو میں اسٹیورٹ سیلڈووٹز کو نیو یارک میں ایک حلال فوڈ شاپ (غالباً فلسطینی یا عرب ملک سے تعلق رکھنے والے کسی شخص کی دکان) کے باہر کھڑے نفرت انگیز کلمات ادا کرتے دیکھا گیا۔
اسٹیورٹ سیلڈووٹز دکاندار سے کہتے ہیں کہ تم دہشتگردوں کو سپورٹ کرتے ہو، تم ایک خطرناک آدمی ہو، اگر ہم 4000 فلسطینی بچوں کو قتل کر دیں تو یہ بھی کافی نہیں ہے۔
امریکی عہدیدار کی ہراساں کرنے کی ویڈیو وائرل ہونے اور پولیس کو شکایت ملنے کے بعد امریکی عہدیدار کے خلاف کارروائی کی گئی۔
