اسرائیلی فوج نے قیدیوں کے تبادلے کے دوران کوریج کو روکتے ہوئے ترک ٹی وی کی ٹیم پر حملہ کر دیا۔
غیر ملکی میڈیا رپورٹس کے مطابق اسرائیلی فوج نے ترک ٹی وی ٹی آر ٹی کی میڈیا ٹیم پر حملہ کیا ہے، قیدیوں کے تبادلے کے دوران اسرائیلی فوج نے میڈیا ٹیموں کو کوریج سے بھی روکا، اور اُن پر آنسو گیس اور دھوئیں کے شیل برسائے۔
ترک ادارے کے کمیونیکیشن ڈائریکٹر نے واقعے کی بھرپور مذمت کرتے ہوئے کہا کہ اسرائیل بین الاقوامی قوانین کی پاس داری کرے۔
ادھر برطانوی ٹی وی اسکائی نیوز نے رپورٹ کیا ہے کہ اسرائیلی پولیس فلسطینی قیدیوں کی واپسی کی کوریج کو دبا رہی ہے، جب کہ دوسری طرف اسرائیلی یرغمالیوں کی رہائی کی بھرپور کوریج ہو رہی ہے۔
رپورٹ میں بتایا گیا ہے کہ یروشلم کے پرانے شہر میں ایک عرب فلسطینی گھرانے کے چار افراد کی رہائی پر جب ان سے ملاقات کی کوشش کی گئی تو اسرائیلی پولیس نے صحافیوں سے کہا ’’ابھی نہیں۔‘‘
