واشنگٹن: امریکا میں سکھ رہنما کے قتل کی سازش میں ملوث ہونے پر بھارتی شہری پر فرد جرم عائد کردی گئی۔
خبر رساں اداروں کے مطابق مین ہٹن میں امریکی عدالت نے سکھ رہنما گرپتونت سنگھ پنوں کے قتل کی سازش میں ملوث ہونے پر بھارتی شہری پر فرد جرم عائد کردی۔
دوران سماعت وفاقی پراسیکیوٹر نے دلائل دیے کہ سکھ رہنما گرپتوت سنگھ کو قتل کرنے کا ٹاسک بھارتی حکومت کے افسر نے نکھل گپتا نامی شخص کو دیا اور پھر قتل کا پورا منصوبہ بنایا گیا۔ سکھ رہنما پر حملے اور انٹیلی جنس رپورٹ کی روشنی میں رواں سال جون میں پولیس نے چیک ری پبلک سے نکھل گپتا کو گرفتار کیا جس نے تفتیش کے دوران قتل کے منصوبے کا اعتراف کیا۔
امریکی محکمہ انصاف کے ان الزامات پر واشنگٹن میں بھارت کے سفارتخانے نے فوری طور پر کوئی ردعمل نہیں دیا۔
واضح رہے کہ گزشتہ ہفتے امریکا کی قومی سلامتی کونسل کے ترجمان جان کربی نے کہا تھا کہ امریکی حکام نے امریکا میں ایک سکھ علیحدگی پسند رہنما گرپتونت سنگھ کو قتل کرنے کی سازش کو ناکام بنا دیا تھا اور بھارتی حکومت کے ملوث ہونے کے خدشات پر نئی دہلی کو وارننگ بھی جاری کی ہے۔
