پنجاب کے محکمہ ایکسائز اینڈ ٹیکسیشن نے شراب اور بیئر کے نرخوں میں ایک بار پھر 15 فیصد اضافہ کر دیا ہے۔
نجی ٹی وی کی رپورٹ کے مطابق محکمہ ایکسائز پنجاب کے ڈائریکٹر جنرل نے نرخوں میں تبدیلی کا نوٹیفکیشن جاری کر دیا ہے، جس کے مطابق شراب اور بیئر کی بوتلوں کی قیمتوں میں 31 روپے سے 120 روپے تک کا اضافہ ہوا ہے۔
رپورٹ کے مطابق اس سے قبل محکمہ ایکسائز نے چند ماہ قبل بھی نرخوں میں 15 فیصد اضافہ کیا تھا۔
منگل کو جاری کردہ نوٹیفکیشن کے مطابق ”لائن وہسکی“ کی بوتل کی قیمت 114 روپے اضافے سے 1173 روپے ہو گئی ہے جبکہ ”کلاسیکل وہسکی“ کی قیمت 113 روپے اضافے سے 2411 روپے ہو گئی ہے۔
اسی طرح ”ونٹیج وہسکی“ کی قیمت 113 روپے اضافے سے 2018 روپے مقرر کی گئی ہے اور بیئر کے ایک کین کی قیمت 531 روپے سے بڑھ کر 560 روپے کردی گئی ہے۔
شراب اور بیئر کی قیمتوں میں اضافے کے بارے میں متعلقہ کمپنیوں کو آگاہ کر دیا گیا ہے۔
