آسٹریلیا کیخلاف پہلے ون ڈے انٹرنیشنل میں مڈل آرڈر بلے باز عرفان خان اور اوپننگ بلے باز صائم ایوب نے اپنے ون ڈے کرکٹ کیریئر کا آغاز کیا۔
دونوں کھلاڑیوں نے میلبورن کرکٹ گرائونڈ میں آسٹریلیا کے خلاف جاری تین ون ڈے میچوں کی سیریز کے ابتدائی میچ میں شرکت کر کے یہ اعزاز حاصل کیا۔
عرفان خان ون ڈے ڈیبیو کرنے والے 243 ویں جبکہ صائم ایوب ون ڈے کیریئر کا آغاز کرنے والے 244 ویں پاکستانی کھلاڑی بن گئے ہیں۔
سابق کپتان و لیجنڈ فاسٹ بولر وسیم اکرم نے ٹاس سے قبل صائم ایوب اور عرفان خان کو ان کے ڈیبیو پر گرین کیپ دی۔
بھارت میں گزشتہ سال ہونے والے آئی سی سی ون ڈے ورلڈ کپ کے بعد پاکستان کا یہ پہلا ون ڈے میچ ہے۔
صائم ایوب اپنے کیریئر کے پہلے ون ڈے میچ میں کوئی خاطر خواہ کارکردگی کا مظاہرہ نہیں کر پائے اور صرف ایک رن بناکر مچل سٹارک کی گیند پر کلین بولڈ ہوگئے جبکہ عرفان خان 22 رنز بناکر رن آؤٹ ہوئے۔
