متحدہ عرب امارات میں قتل کے مقدمات میں ملوث دو بھارتی شہریوں کو سزائے موت دے دی گئی۔ یہ دونوں افراد بھارتی ریاست کیرالا کے رہائشی تھے اور ان پر قتل کے الگ الگ مقدمات میں الزامات ثابت ہوئے تھے۔
بھارتی وزارت خارجہ نے بھی اس کی تصدیق کرتے ہوئے بتایا کہ سزائے موت پانے والے افراد میں محمد رناش اور مرالی دھرن شامل ہیں، دونوں کا تعلق کیرالا کے علاقے کنار سے ہے۔
رپورٹس کے مطابق محمد رناش متحدہ عرب امارات میں ایک ٹریول ایجنسی میں ملازمت کرتا تھا جبکہ مرالی دھرن پر بھارتی تارکین وطن کو قتل کرنے کا جرم ثابت ہوا۔
متحدہ عرب امارات کے حکام نے دونوں افراد کی سزائے موت سے متعلق 28 فروری کو بھارتی سفارتخانے کو آگاہ کیا تھا، جس کے بعد سفارتخانے نے ان کے اہلخانہ سے رابطہ کر کے قانونی معاونت فراہم کی۔
بھارتی وزارت خارجہ کے مطابق دونوں کی طرف سے رحم اور معافی کی اپیلیں دائر کی گئی تھیں، تاہم یو اے ای کی سپریم کورٹ نے اپیلیں مسترد کرتے ہوئے سزائے موت کا فیصلہ برقرار رکھا۔
