غیر قانونی طور پر مقیم غیرملکیوں اور افغان باشندوں کے خلاف 31 مارچ 2025 کے بعد سخت ایکشن کا فیصلہ کرلیا گیا۔ سیکیورٹی ذرائع کے مطابق غیر قانونی غیرملکیوں کی وطن واپسی کی ڈیڈ لائن میں توسیع نہیں کی جائے گی۔ مقررہ تاریخ کے بعد غیر قانونی غیرملکیوں اور افغان سٹیزن کارڈ ہولڈرز کے خلاف قانونی کارروائی کی جائے گی، اور انہیں گرفتار کرکے ملک بدر کیا جائے گا۔
سیکیورٹی ذرائع کا کہنا ہے کہ پاکستان میں بڑھتی دہشتگردی کے واقعات میں افغان شہریوں کے براہ راست ملوث ہونے کے بعد یہ فیصلہ کیا گیا ہے۔ 4 مارچ 2025 کو بنوں کینٹ خودکش حملوں میں فتنہ الخوراج کے 16 دہشتگرد جہنم واصل کئے گئے تھے، جن میں افغان دہشتگرد بھی شامل تھے۔
وزارت داخلہ نے واضح کیا ہے کہ غیر قانونی طور پر مقیم غیرملکی اور افغان سٹیزن کارڈ ہولڈرز 31 مارچ تک رضاکارانہ طور پر پاکستان چھوڑ دیں۔ یکم اپریل سے تمام غیر قانونی طور پر مقیم غیرملکیوں کی ملک بدری کا عمل شروع کردیا جائے گا۔ واپسی کے عمل کے دوران کسی کے ساتھ بدسلوکی نہیں کی جائے گی، اور واپس جانے والے غیرملکیوں کے لیے خوراک اور صحت کی دیکھ بھال کے انتظامات بھی کیے گئے ہیں۔
