تراویح کے دوران فائرنگ کرکے پولیس اہلکار سمیت 3 افراد قتل کردیے گئے۔ پولیس کے مطابق، نارووال میں دیرینہ دشمنی کی بنا پر نماز تراویح پڑھتے افراد پر نامعلوم افراد نے اندھا دھند فائرنگ کی، جس سے اسپیشل برانچ کے اہلکار سمیت 3 افراد جاں بحق اور ایک شدید زخمی ہوگیا۔
ایس ایچ او سٹی نارووال توحید الرحمان کے مطابق، انعام اللہ بٹ کی حویلی کے کمرے میں نماز تراویح ادا کی جا رہی تھی کہ نامعلوم افراد نے فائرنگ کردی، جس کے نتیجے میں ٹرانسپورٹر عمران بٹ، شاہد بٹ اور اسپیشل برانچ پنجاب پولیس کا اہلکار ظفر اقبال جاں بحق ہوگئے جبکہ شہباز نامی شخص شدید زخمی ہوگیا۔
ابتدائی اطلاعات کے مطابق، مقتولین کی نجی لاری اڈا اسٹینڈ کی وجہ سے دیرینہ دشمنی چل رہی تھی۔ واقعے کے بعد ڈی پی او نارووال ملک نوید سمیت پولیس کی بھاری نفری موقع پر پہنچی اور لاشوں کو تحویل میں لے کر اسپتال منتقل کیا جبکہ زخمی کو طبی امداد دی جا رہی ہے۔ دوسری جانب، آئی جی پنجاب ڈاکٹر عثمان انور نے واقعے کا نوٹس لیتے ہوئے آر پی او گجرانوالہ سے رپورٹ طلب کرلی ہے اور فائرنگ میں ملوث ملزمان کی فوری گرفتاری کا حکم دیا ہے۔
