دبلا پتلا اور اسمارٹ نظر آنے کی خواہش اکثر لڑکیوں میں پائی جاتی ہے، جس کیلئے خواتین مختلف ورزش اور ڈائٹنگ کرتی ہیں۔ بھارتی میڈیا رپورٹس کے مطابق، بھارتی شہر تھیلاسری کی 18 سالہ سری نندا اسمارٹ نظر آنے کی خواہش میں اپنی جان گنوا بیٹھی۔ سری نندا مختلف ٹوٹکوں پر عمل کرتے ہوئے گزشتہ 6 ماہ سے صرف پانی پر زندہ تھی، جس کی وجہ سے اس کی طبیعت بگڑ گئی۔
ڈاکٹرز کے مطابق، سری نندا کی حالت خراب ہونے پر اسے آئی سی یو میں وینٹی لیٹر پر رکھا گیا تھا۔ اس کا وزن صرف 24 کلو تھا اور اس کی شوگر لیول، سوڈیم اور بی پی کم تھا۔ طبی امداد کے باوجود، وہ جانبر نہ ہو سکی اور دم توڑ گئی۔ سری نندا anorexia کی بیماری میں مبتلا تھی، جس میں لوگ وزن کم کرنے کے لیے کھانا پینا چھوڑ دیتے ہیں۔ لڑکی کے والدین کا کہنا ہے کہ بیٹی کو کھانا دیا جاتا تھا لیکن وہ اسے چھپا دیتی تھی اور صرف گرم پانی پر گزارا کرتی تھی۔
