دنیا میں سانپوں کی بے شمار نسلیں پائی جاتی ہیں لیکن پائی تھن اور ایناکونڈا کو دنیا کے سب سے بڑے سانپوں میں شمار کیا جاتا ہے۔ یہ جانوروں میں دلچسپی رکھنے والوں کا ایک مقبول موضوع ہے کہ کون سا سانپ سب سے بڑا ہے۔ پائی تھن اور ایناکونڈا کے علاوہ، ٹائٹانوبوا نامی سانپ بھی دنیا کے بڑے سانپوں میں شامل ہے۔ سمتھسونین نیشنل زو اینڈ کنزرویشن بائیولوجی انسٹی ٹیوٹ کے مطابق، گرین ایناکونڈا اس وقت دنیا کے سب سے بھاری سانپ ہیں جن کا وزن 250 کلوگرام تک پہنچ سکتا ہے۔ سب سے بڑے گرین ایناکونڈا کا کوئی سرکاری ریکارڈ دستیاب نہیں لیکن 2016 میں برازیل میں 10 میٹر لمبا سانپ دریافت ہوا تھا۔ ٹائٹانوبوا، جو اب ناپید ہو چکا ہے، تاریخ کے سب سے بڑے سانپوں میں سے ایک سمجھا جاتا ہے۔ اس کی لمبائی 13 میٹر (تقریباً 42 فٹ) تھی اور یہ جنوبی امریکہ کے جنگلات اور دریاؤں میں پایا جاتا تھا۔
