بھارتی ریاست راجستھان کے شہر جے پور میں ایک افسوسناک واقعہ پیش آیا، جہاں آخری رسومات کے دوران شہد کی مکھیوں کے جھنڈ نے اچانک حملہ کر دیا، جس کے نتیجے میں تقریباً 50 افراد زخمی ہو گئے۔
میڈیا رپورٹس کے مطابق، ایک شخص کی آخری رسومات کے دوران چِتا کی آگ کی حدت سے قریب موجود شہد کی مکھیوں کا چھتہ متاثر ہوا، جس کے بعد ہزاروں مکھیاں بپھر گئیں اور وہاں موجود سوگواروں پر ٹوٹ پڑیں۔
عینی شاہدین کے مطابق اچانک ہونے والے اس حملے کے بعد جنازے میں شریک افراد میں بھگدڑ مچ گئی، لوگ مکھیوں سے بچنے کے لیے دوڑنے لگے، تاہم درجنوں افراد مکھیوں کے ڈنک لگنے سے شدید زخمی ہو گئے۔
واقعے کی اطلاع ملتے ہی امدادی ٹیمیں موقع پر پہنچ گئیں اور زخمیوں کو فوری طور پر قریبی اسپتال منتقل کیا گیا۔ طبی عملے کے مطابق زیادہ تر افراد کو معمولی چوٹیں آئیں اور انہیں ابتدائی طبی امداد کے بعد گھر جانے کی اجازت دے دی گئی، تاہم کچھ افراد کو مزید نگرانی کے لیے اسپتال میں داخل کر لیا گیا ہے۔
ماہرین کا کہنا ہے کہ شہد کی مکھیاں عام طور پر چھیڑ چھاڑ نہ ہونے پر حملہ نہیں کرتیں، لیکن گرمی، آگ یا اچانک خطرہ محسوس ہونے پر وہ دفاعی انداز اختیار کرتے ہوئے حملہ آور ہو جاتی ہیں۔ اس طرح کے واقعات اکثر گرم موسم میں پیش آتے ہیں، جہاں شہد کی مکھیاں زیادہ حساس ہو جاتی ہیں۔
