سعودی عرب: رمضان المبارک کے آخری عشرے میں زائرین کی بڑھتی ہوئی تعداد کے پیش نظر حرمین ہائی اسپیڈ ٹرین کی سروس میں نمایاں اضافہ کر دیا گیا ہے، جس کے تحت روزانہ 130 ٹرینیں مدینہ منورہ سے مکہ مکرمہ تک چلائی جائیں گی۔
سعودی پریس ایجنسی (SPA) کے مطابق، رمضان آپریشن پلان کے تحت زائرین کی سہولت کے لیے بوگیوں اور ٹرینوں کی تعداد میں اضافہ کیا گیا ہے۔ منصوبے کے تحت، رمضان کے دوران 1.6 ملین زائرین کو 3400 ٹرینوں کے ذریعے سفر کی سہولت دی جائے گی۔
مزید سہولت کے لیے مدینہ منورہ اسٹیشن پر مسافروں کے لیے دو نئے لاونچ کھول دیے گئے ہیں، جبکہ گیٹس کی تعداد 8 سے بڑھا کر 24 کر دی گئی ہے تاکہ رش کے دوران زائرین کو زیادہ آسانی ہو۔
واضح رہے کہ حرمین ہائی اسپیڈ ٹرین دنیا کی 10 تیز رفتار ٹرینوں میں شامل ہے اور مشرق وسطیٰ کا سب سے بڑا ریلوے منصوبہ تصور کیا جاتا ہے۔
