سعودی حکومت نے حج 2025 کی تیاریوں کے دوران میننجائٹس ویکسین کو لازمی قرار دے دیا ہے۔
وزارت حج و عمرہ کے مطابق، ویکسینیشن کے بغیر کسی بھی ملکی یا غیرملکی زائر کو حج کی اجازت نہیں دی جائے گی، اور بغیر ویکسینیشن کے حج پیکج بک کرنا یا رجسٹریشن کرانا ممکن نہیں ہوگا۔
حکام کے مطابق، یہ اقدام حج کے دوران متعدی بیماریوں کے پھیلاؤ کو روکنے کے لیے اٹھایا گیا ہے۔ میننجائٹس ایک خطرناک بیماری ہے جو زیادہ رش والی جگہوں پر تیزی سے پھیل سکتی ہے، اس لیے زائرین کو اس سے محفوظ رکھنے کے لیے ویکسینیشن انتہائی ضروری ہے۔
سعودی حکومت کا یہ اعلان حج 2025 کی تیاریوں کے آغاز پر سامنے آیا ہے، جب مختلف ممالک بشمول پاکستان کے ساتھ حج معاہدے طے پا رہے ہیں۔ عازمین کو ہدایت کی گئی ہے کہ وہ بروقت ویکسین لگوالیں تاکہ ان کی رجسٹریشن میں کسی قسم کی رکاوٹ نہ آئے۔
