محکمہ موسمیات نے ملک کے جنوبی حصوں میں ہیٹ ویو، بالائی علاقوں میں بارش کی پیشگوئی کر دی۔
محکمہ موسمیات کے مطابق جنوبی حصوں میں گرمی کی لہر ( ہیٹ ویو) جیسی صورتحال ہے، ملک کے بالائی علاقوں میں 8 سے 11 اپریل تک بارشوں کا امکان ہے۔
رپورٹ کے مطابق 8 اپریل سے ملک کے بالائی علاقوں میں مغربی ہواؤں کا سلسلہ داخل ہوگا، 8 سے 11 اپریل کے دوران چترال، دیر، سوات، شانگلہ، کوہستان، مانسہرہ میں بارشوں کا امکان ہے۔
محکمہ موسمیات نے ایبٹ آباد، بٹگرام، بونیر، باجوڑ، گلگت بلتستان میں وقفے وقفے سے بارشوں کی پیشگوئی کی ہے، خطہ پوٹھوہار ، اسلام آباد ، راولپنڈی ، جہلم ، چکوال ، تکہ گنگ میانوالی ، شمال مشرقی پنجاب میں بارشوں کی توقع ہے۔
رپورٹ کے مطابق پنجاب، خیبرپختونخوا ، بالائی سندھ کے میدانی علاقوں میں گرد آلود ہوائیں متوقع ہیں، وسطی، جنوبی پنجاب ، سندھ ، بلوچستان کے کچھ حصوں میں درجہ حرارت معمول سے 4 سے 7 ڈگری سینٹی گریڈ زیادہ رہنے کا امکان ہے۔
محکمہ موسمیات کی جانب سے بڑھتے ہوئے درجہ حرارت کے باعث وسطی اور جنوبی علاقوں میں شہریوں کو احتیاطی تدابیر اختیار کرنے کی ہدایت کی گئی ہے۔
ماہرین موسمیات کا کہنا ہے کہ دن کے دوران دھوپ میں کم سے کم نکلا جائے، پانی کا زیادہ استعمال کریں، کاشت کار حضرات اپنی فصلوں کے معاملات موسمی حالات کے مطابق ترتیب دیں۔
