چیف جسٹس آف پاکستان یحییٰ آفریدی نے بنوں کا دورہ کیا، سپریم کورٹ کی جانب سے جاری اعلامیے کے مطابق چیف جسٹس نے عدالتی اصلاحات، قانونی تربیت اور ادارہ جاتی ہم آہنگی پر زور دیا اور مشکل حالات میں خدمات انجام دینے والے ججز سے اظہار یکجہتی کیا۔
اعلامیے کے مطابق چیف جسٹس نے 16 مئی کو پشاور ہائیکورٹ کی بنوں بینچ کا دورہ کیا، جہاں انہوں نے مشکل حالات میں خدمات انجام دینے والے ججز سے اظہار یکجہتی کیا۔
اعلامیے میں کہا گیا کہ چیف جسٹس نے ڈسٹرکٹ جوڈیشری کی خودمختاری کو مؤثر انصاف کے لیے ناگزیر قرار دیا اور چیف جسٹس پشاور ہائیکورٹ جسٹس ایس ایم عتیق شاہ سے ملاقات میں عدلیہ و وکلا کی استعداد کار بڑھانے پر زور دیا۔
اعلامیے کے مطابق انھوں نے کرک، لکی مروت اور شمالی وزیرستان کے ججز سے بھی ملاقات کی، جس میں قانونی تربیت، ادارہ جاتی تعاون اور آٹومیشن کے نفاذ جیسے امور زیر بحث آئے۔
چیف جسٹس نے قیدیوں کے حالات جاننے کے لیے جیل، اسپتال اور کچن کا معائنہ کیا اور براہ راست قیدیوں سے بات کی، اس موقع پر ڈرگ ری ہیبیلیٹیشن سینٹر کا افتتاح بھی کیا گیا۔
اعلامیے میں کہا گیا کہ چیف جسٹس کو قیدی بہادر خان سے ملوایا گیا، جس کا کیس 2019 سے زیر التوا تھا اور حال ہی میں 23 اپریل کو فیصلہ ہوا، چیف جسٹس نے تاخیر پر افسوس کا اظہار کیا اور پولیس کو بروقت چالان جمع کرانے کی ہدایت دی۔
انہوں نے ججز کے لیے تربیتی ماڈیولز، مراعات اور کم ترقی یافتہ علاقوں میں وسائل کی ترجیحی فراہمی پر بھی زور دیا۔
