نیوزی لینڈ میں موجود پاکستان کرکٹ اسکواڈ کے ایک اور رکن کا کورونا ٹیسٹ مثبت آگیا جس کے بعد پاکستانی سکواڈ میں کورونا کا شکار ہونے والے ارکان کی مجموعی تعداد 8 ہوگئی ۔
نیوزی لینڈ کے متعلقہ حکام سے تبادلہ خیال کے بعد پی سی بی کی طرف سے جاری کردہ اپ ڈیٹ کے مطابق اب تک پہلے، تیسرے اور چھٹے روز ہونے والی کووڈ 19 ٹیسٹنگ میں قومی اسکواڈ کے 54 میں سے کُل 8 ارکان کے ٹیسٹ کی رپورٹ مثبت آچکی ہے۔ ان 8 ارکان میں سے 2 کو ہسٹارک (نان انفیکشیس) کیسز قرار دیا گیا ہے، لہٰذا یہ دونوں ارکان اسکواڈ کے دیگر ارکان کے ہمراہ اُسی منزل پر اپنی آئسولیشن کی مدت پوری کررہے ہیں۔
وزارت صحت نیوزی لینڈ نے اس بات کی تصدیق کرتے ہوئے کہا ہےکہ کورونا کا شکار ہونے والے اس رکن کا تعلق ان تین کیسز سے ہے جن کے بارے میں کہا گیا تھا کہ ان کے کیسز کا جائزہ لیا جا رہا ہے۔
نیوزی لینڈ کے وزارت صحت کاکہنا ہے کہ پاکستان اسکواڈ کو ابھی ٹریننگ کی اجازت نہیں لہٰذا میڈیکل آفیسر کے صورتحال کا جائزہ لینےکےبعد ٹریننگ کی اجازت دی جائےگی جب کہ پاکستان اسکواڈ کی اگلی کووڈ 19 ٹیسٹنگ کل ہو گی۔
نویں روز (جمعرات) کو ہونے والی کووڈ 19 ٹیسٹنگ میں جن ارکان کے ٹیسٹ کے نتائج منفی آئیں گے، انہیں نیوزی لینڈ کی وزارت صحت کی جانب سے حتمی منظوری ملنے کے بعد اپنی آئسولیشن کی بقیہ مدت میں ٹریننگ کی اجازت ملنے کا امکان ہے۔
بارہویں روز کیے جانے والے کووڈ 19 ٹیسٹ کے بعد جو ارکان آئسولیشن کی مدت کے 14ویں روز ہونے والا اپنا ہیلتھ چیک اپ کلیئر کرلیں گے انہیں نیوزی لینڈ کی وزارت صحت کی جانب سے حتمی منظوری ملنے کے بعد مینیجڈ آئسولیشن چھوڑنے کی اجازت ہوگی۔
پاکستان کرکٹ بورڈ نہ صرف نیوزی لینڈ میں موجود قومی کرکٹ ٹیم کی مینجمنٹ سے مسلسل رابطے میں ہے بلکہ وہ انہیں ٹریننگ میں واپسی سے متعلق ہر اپ ڈیٹ سے بھی آگاہ کررہا ہے۔ ٹیم مینجمنٹ اور تمام کھلاڑی اس عمل کو مکمل سپورٹ کررہے ہیں اور وہ حکومت نیوزی لینڈ کے مقررہ قوانین کے تحت جلد از جلد ٹریننگ کا آغاز کرنے کے منتظر ہیں۔
