کرائسٹ چرچ ٹیسٹ میں نیوزی لینڈ نے پاکستان کو اننگز اور 176 رنز سے شکست دے کر سیریز میں کلین سوئپ مکمل کرلیا۔
کرائسٹ چرچ ٹیسٹ میں پاکستانی بیٹنگ لائن ایک بار پھر بری طرح ناکام رہی، پہلی اننگز میں 297 رنز پر پوری ٹیم آؤٹ ہوگئی تھی جس میں اظہر علی 93، کپتان محمد رضوان 61 اور فہیم اشرف 48 رنز بنانے میں کامیاب رہے تھے جب کہ دیگر بلے بازوں میں شان مسعود 0، عابد علی 25، حارث سہیل 1، فواد عالم 2 رنز کے مہمان ثابت ہوئے۔ نیوزی لینڈ کی جانب سے کائلز جمیسن نے 5، ٹم ساؤتھی اور ٹرینٹ بولٹ نے 2،2 وکٹیں حاصل کیں۔
قومی ٹیم کے اوپنر شان مسعود نے تیسرے روز ہی ایک بار پھر کھاتہ کھولے بغیر اپنی وکٹ گنوادی تاہم چوتھے روز بھی پاکستانی بلے باز کیوی بولرز کے آگے بیٹنگ کرنا ہی بھول گئے۔ عابد علی 26، حارث سہیل 15، اظہر علی 37، کپتان محمد رضوان 10 ، فواد عالم 16، فہیم اشرف 28، ظفر گوہر37 رنز بنانے میں کامیاب رہے۔
نیوزی لینڈ کے کائیل جیمیسن نے اننگز میں 6 اور میچ میں 11 وکٹیں حاصل کیں، جس پر انہیں مین آف دی میچ جب کہ کپتان کین ولیمسن کو مین آف دی سیریز سے نوازا گیا۔
