کیپ ٹاؤن: جنوبی افریقہ میں پالتو بلیوں اور کتوں کی کورونا ٹیسٹنگ کا فیصلہ کیا گیا ہے۔
غیر ملکی میڈیا کے مطابق جنوبی افریقہ میں چند ہفتے قبل ایک پالتو بلی میں کورونا وائرس کی تصدیق ہوئی تھی جس کے بعد اب حکام نے پالتو بلیوں اور کتوں کی کورونا ٹیسٹنگ کا فیصلہ کیا ہے۔
میڈیا رپورٹس میں بتایا گیا ہے کہ انسانوں کے ساتھ نظر آنیوالے صرف ایسے پالتو جانور جن میں بخار اور سانس لینے میں دشواری کی علامات پائی جائیں گی ان کی فوری کورونا ٹیسٹنگ کی جائیگی جبکہ پالتو جانور میں کورونا مثبت آنے کی صورت میں انہیں لازمی طور پر گھر میں قرنطینہ کیا جائے گا۔
میڈیا رپورٹس کے مطابق کورونا وائرس ٹیسٹ مثبت آنے پر پالتو جانوروں کو لازمی طور پر آئسولیشن سینٹرز نہیں بھیجا جائیگا کیونکہ اب تک جانوروں سے انسانوں میں کورونا وائرس کی منتقلی کے کوئی شواہد سامنے نہیں آئے ہیں۔
جنوبی افریقی حکام کا پریس بریفنگ میں کہنا ہے کہ اگر کورونا سے متاثرہ پالتو جانور کا مالک بھی کورونا میں مبتلا ہے اور شدید بیمار یا زائد العمر ہے تو پھر جانوروں کو قرنطینہ سینٹر بھجوایا جائے گا۔
حکام نے شہریوں کو ایک بار پھر تاکید کی ہے کہ وہ اپنے پالتو جانوروں کو خود سے 2 میٹر کے فاصلے پر رکھیں اور ان کے ساتھ واک کے دوران بھی یہی اصول اپنائیں۔
میڈیا رپورٹس کے مطابق جنوبی افریقہ میں رواں ماہ ایک بلی میں کورونا وائرس کی تصدیق ہوئی اور محکمہ صحت کے حکام کو شبہ ہے کہ کورونا میں مبتلا ماں اور بیٹی سے اس بلی میں وائرس منتقل ہوا ہے۔
