ثقلین مشتاق نے مصباح اور وقار کیلیے بھاگ جانے کے الفاظ کو نامناسب قرار دے دیا۔
میڈیا سے گفتگو کرتے ہوئے ثقلین مشتاق نے کہا کہ دونوں سابق کپتانوں اور کوچز کے لئے بھاگ جانے کے الفاظ مناسب نہیں، مصباح اور وقار کا دستبردار ہونا ان کا ذاتی فیصلہ ہے۔
ثقلین مشتاق نے کہا کہ پاکستان کرکٹ ٹیم کی کوچنگ اعزاز ہے ، پوری توجہ نیوزی لینڈ کی سیریز پر ہے ، مستقبل کی کوچنگ کا بعد میں سوچیں گے، ہار کے خوف سے نکل کر جارحانہ کرکٹ کھیلنا ہو گی ، ہار جیت کی ذمہ داری سینہ تان کر قبول کروں گا۔
واضح رہے کہ سابق ٹیسٹ کرکٹر رمیز راجہ کے چیئرمین پی سی بی کا عہدہ باقاعدہ سنبھالنے سے پہلے ہی بڑی تبدیلیاں سامنے آئی ہیں اور قومی کرکٹ ٹیم کے ہیڈ کوچ مصباح الحق اور بولنگ کوچ سابق فاسٹ بولر وقار یونس کوچنگ کے عہدوں سے دستبردار ہوگئے ہیں۔جس پر حال ہی میں تبصرہ کرتے ہوئے سابق فاسٹ بالر شعیب اختر کا کہنا تھا کہ مصباح اور وقار بے نقاب ہوکر بھاگ نکلے۔
خیال رہے کہ پاکستان کرکٹ بورڈ نے ان عہدوں پر سابق ٹیسٹ کرکٹر ثقلین مشتاق اور سابق آل راؤنڈر عبدالرزاق کو عارضی طور پر تعینات کردیا ہے۔
