اسلام آباد:امریکی حکومت نے پاکستان میں سیلاب سے متاثرہ اضلاع سے تعلق رکھنے والے یونیورسٹی سطح کے پاکستانی طالب علموں کو اعلیٰ تعلیم کی تکمیل میں معاونت کے لئے 500نئے وظائف دینے کا اعلان کیا ہے۔
یہ اعلان پاکستان میں متعین امریکی سفیر ڈونلڈ بلَوم نے خواتین کے عالمی دن کے موقع پر ہائر ایجوکیشن کمیشن (ایچ اِی سی) کی جانب سے اسلام آباد میں خواتین دانشوروں کی کامیابیوں کا جشن منانے کیلئے منعقد ایک تقریب کے دوران کیا۔
تقریب میں وفاقی وزیر برائے منصوبہ بندی و ترقی احسن اقبال، ہائر ایجوکیشن کمیشن کے چیئرمین ڈاکٹر مختار احمد، نیشنل ڈیزاسٹر مینجمنٹ اتھارٹی کے چیئرمین لیفٹیننٹ جنرل انعام حیدر ملک، ایچ ای سی کی ایگزیکٹو ڈائریکٹر ڈاکٹر شائستہ سہیل، یو ایس ایڈ کے مشن ڈائریکٹر رِیڈ ایشل مین، یونیورسٹیوں کے وائس چانسلرز، حاضر اور سابقہ طالبعلموں نے شرکت کی۔
امریکہ یو ایس ایڈ کے توسط سے مالی طور پر پسماندہ مگر تعلیمی میدان میں ہونہار طالبعلموں کو اعلیٰ تعلیم کے حصول کے لئے وظائف دیتا ہے جن میں ہائر ایجوکیشن کمیشن کے ساتھ اشتراک میں امریکی حکومت کی جانب سے اہلیت کی بنیاد پر ضرورت مند طالبعلموں کو 6ہزار سے زیادہ وظائف کی فراہمی بھی شامل ہے۔
امریکی حکومت کی جانب سے اعلیٰ تعلیم کے حصول میں خواتین کی معاونت کی پالیسی کے تحت مذکورہ وظائف میں سے 60 فیصد خواتین کو فراہم کئے گئے ہیں۔
تقریب سے خطاب کرتے ہوئے امریکی سفیر ڈونلڈ بلَوم نے کہا کہ خواتین کا عالمی دن نہ فقط ہماری ماؤں، دادیوں،نانیوں، بہنوں اور بیٹیوں کی سماجی، معاشی، ثقافتی اور سیاسی کامیابیوں کا جشن منانے کا موقع ہے بلکہ یہ دن صنفی مساوات یقینی بنانے کی جدوجہد میں تیزی لانیاورصنف سے وابستہ گِھسے پِٹے تصورات کے خاتمہ کا بھی متقاضی ہے۔
ایچ ای سی کے چیئرمین ڈاکٹر مختار احمد نے کہا کہ پاکستان میں کلیدی اہمیت کے حامل شعبوں بالخصوص تعلیم کے میدان میں امریکی حکومت کی جانب سے حمایت قابل ستائش ہے۔
وظائف حاصل کرنے والے متعدد پسماندہ طالبعلم نہ صرف یونیورسٹی سطح کی تعلیم مکمل کرتے ہوئے خود کو اور اپنے خاندانوں کو غربت سے باہر نکالنے میں کامیاب ہوتے ہیں بلکہ پاکستان کی معیشت کو متحرک رکھنے والی مہارتوں اور معلومات کی رسد بھی مہیا ہوتی ہے۔
وفاقی وزیرِ منصوبہ بندی احسن اقبال نے سیلاب سے متاثرہ طالبعلموں کے لئے امریکی معاونت کا خیر مقدم کرتے ہوئے کہا کہ پاکستان نے تباہ کْن سیلاب سے بہت زیادہ نقصان برداشت کیا ہے اور لاکھوں افراد بے گھر اور بے روزگار ہوئے ہیں، اس صورتحال میں ریاست ہائے متحدہ امریکہ اور دیگر مْخیر اداروں کا انسانی ہمدری کی بنیاد پر ردعمل قابل تحسین ہے۔
سکالرشپ سے مستفید ہونے والی ایک طالبہ جینیفر عندلیب نے اعلیٰ تعلیم کے حْصول میں خود کو درپیش آنے والی رکاوٹوں کی روداد بیان کرتے ہوئے کہا کہ معاشرہ میں مثبت تبدیلی صرف تعلیم میں سرمایہ کاری کرنے سے ہی لائی جا سکتی ہے اور تعلیم یافتہ اور بااختیار خواتین پاکستان کا روشن مستقبل یقینی بنانے کے لئے نمایاں اہمیت رکھتی ہیں۔
