مگرمچھ کے جبڑوں سے کسی شخص کا بچ جانا ناممکن سا لگتا ہے لیکن ایک شخص نے مگرمچھ کے جبڑوں سے اپنی یجان بچا کر سب کو حیران کردیا۔
غیرملکی خبررساں ادارے کی رپورٹ کے مطابق یہ واقعہ آسٹریلیا میں پیش آیا جہاں چارلس ہارڈی آئی لینڈز کے قریب اسنورکیلنگ کرنے والے 51 سالہ مارکوس میکگرون نامی شخص پر مگرمچھ نے حملہ کیا۔
مارکوس میکگرون اپنے دوستوں اور اہلیہ کے ساتھ وہاں تفریح کے لیے آئے تھے اور کھارے پانی کے مگرمچھ نے پیچھے سے ان پر حملہ کیا۔
پہلے تو مارکوس میکگرون کو لگا کہ شارک مچھلی نے حملہ کیا ہے مگر ہاتھوں سے حملہ آور کو چھونے پر انہیں معلوم ہوا کہ یہ مگرمچھ ہے۔
انہوں نے بتایا کہ ‘مجھے احساس ہوا کہ یہ ایک مگرمچھ ہے، خوش قسمتی سے میں اس کے جبڑے کو اتنا کھولنے میں کامیاب رہا جس سے سر نکالنا ممکن ہوگیا’۔
انہوں نے مزید بتایا کہ ‘مگرمچھ نے دوسری بار حملہ کرنے کی کوشش کی مگر میں نے اسے اپنے دائیں ہاتھ سے پیچھے دھکیل دیا جس پر اس نے کاٹ بھی لیا۔ میں ایک بار پھر مگرمچھ کی گرفت سے نکل گیا اور پھر کشتی تک پہنچنے میں کامیاب رہا’۔
ان کے اندازے کے مطابق مگرمچھ 2 سے 3 میٹر لمبا تھا اور واقعے کے بعد انہیں قریبی جزیرے میں لے جایا گیا، جہاں سے ہیلی کاپٹر کے ذریعے اسپتال پہنچایا گیا۔
اسپتال میں ان کے سر اور ہاتھ کے زخموں کا علاج کیا گیا۔
