اسلام آباد : عالمی مالیاتی فنڈ ( آئی ایم ایف ) نے پنشن کو بجٹ سے نکال کر پنشن فنڈ میں رکھنے کی تجویز دے دی اور کہا قبل از وقت ریٹائرمنٹ کی حوصلہ شکنی کی جائے۔
تفصیلات کے مطابق پاکستان اور آئی ایم ایف کے درمیان اکتوبر کے آخری ہفتے میں مذاکرات کی تیاریاں جاری ہے، ذرائع وزارت خزانہ نے بتایا ہے کہ آئی ایم ایف نے پنشن اصلاحات پر عمل درآمد کا مطالبہ کر رکھا ہے۔
ذرائع کا کہنا ہے کہ آئی ایم ایف پنشن اصلاحات کے ذریعے پنشن فنڈز میں کمی چاہتا ہے، گزشتہ 12سال میں پنشن کے بجٹ میں500 فیصد اضافہ ہوا۔
آئی ایم ایف نےپنشن کو بجٹ سے الگ کرنے کا مطالبہ کر رکھا ہے اور تجویز دی ہے کہ پنشن کوبجٹ سے نکال کر پنشن فنڈ میں رکھا جائے، پنشن کو بجٹ سے الگ کرنے سے خسارہ کم ہوسکتا ہے۔
آئی ایم ایف نے تجویز دی کہ قبل از وقت ریٹائرمنٹ کی حوصلہ شکنی کی جائے اور پنشنرزکو صرف ایک پنشن دی جائے۔
عالمی مالیاتی فنڈ کا کہنا ہے کہ مختلف اداروں میں کام کرنیوالےریٹائرڈ افسران کوالگ الگ پنشن نہ دی جائے، ایک پنشنر کو 3،3پنشن دینے کا سلسلہ ختم ہونا چاہیے۔
