غزہ پر فضائی حملوں کے بعد اسرائیل نے مقبوضہ مغربی کنارے پر بھی فضائی حملے شروع کردیے۔
صیہونی فضائیہ نے مقبوضہ مغربی کنارے کے علاقے جنین کے پناہ گزین کیمپ کی مسجد کو نشانہ بنایا جس میں 2 فلسطینی شہید اور متعدد زخمی ہوگئے۔
علاوہ ازیں مقبوضہ مغربی کنارے میں رات گئے اسرائیلی فوجیوں کے ہاتھوں مزید 4 فلسطینی شہید ہوگئے۔
اسرائیلی فوجیوں نے جنین، نابلس اور طمون شہروں میں فلسطینیوں کو نشانہ بنایا۔
دوسری جانب اسرائیلی فوجیوں نے مقبوضہ مغربی کنارے سے مزید 42 فلسطینیوں کو گرفتار کرلیا، زیادہ تر گرفتاریاں رام اللہ، الخلیل اور جنین کے علاقوں میں کی گئیں۔
الجزیرہ نیوز کے مطابق 7 اکتوبر سے غزہ پر اسرائیل کے حملوں کے آغاز سے مقبوضہ مغربی کنارے میں بھی 91 فلسطینیوں کو شہیدکیا جا چکا ہے۔
دوسری جانب اسرائیلی فوج نے غزہ پر آج سے حملے مزید تیز کرنے کا اعلان کیا ہے۔
حماس کا کہنا ہےکہ غزہ پر رات گئے ہونے والی اسرائیلی بمباری میں 55 افراد شہید اور 30 سے زائدگھر تباہ ہوگئے۔
اسرائیلی فوج نے ایک بار پھر فلسطینیوں کو جنوب کی طرف جانے کی دھمکی دے دی ہے۔
غزہ پر اسرائیلی بمباری سے دو ہفتوں کے دوران شہید فلسطینیوں کی تعداد 4 ہزار 7 سو سے تجاوز کرگئی ہے، شہدا میں 40 فیصد معصوم بچے شامل ہیں جب کہ زخمی 16 ہزار تک پہنچ گئے ہیں۔
اسرائیل نے 24 فلسطینی اسپتالوں کو خالی کرنےکی وارننگ بھی دی ہے، فلسطینی ہلال احمر نے غزہ کے اسپتالوں کو خالی کرنےکی اسرائیلی وارننگ کو مریضوں کے لیے سزائے موت جیسا قرار دیا ہے اور کہا ہےکہ زخمیوں کی حالت تشویش ناک ہے، انہیں بحفاظت کہیں اور منتقل نہیں کرسکتے۔
