روم: یورپی ملک اٹلی نے اسرائیل کی وحشیانہ بمباری سے زخمی ہونے والے فلسطینیوں کے علاج کیلئےہسپتال پر مبنی بحری جہاز بھیجنے کا اعلان کر دیا۔
غیر ملکی میڈیا کی رپورٹس کے مطابق اٹلی کے وزیر دفاع گیڈو کروسیٹو نے اپنے بیان میں بتایا کہ ہسپتال پر مبنی بحری جہاز بدھ (آج) روانہ ہو رہا ہے جس میں 170 میڈیکل اسٹاف ہوگا۔
گیڈو کروسیٹو کے مطابق بحری جہاز بندر گاہ Civitavecchia سے روانہ ہوگا، اس کے علاوہ غزہ میں فیلڈہسپتال بھیجنے پر بھی کام کر رہے ہیں۔
انہوں نے بتایا کہ اٹلی بحریہ کے دو جہاز پہلے ہی مشرق وسطیٰ روانہ کر دیے گئے ہیں۔
ہم طے کریں گے کہ ان جہازوں کو وہاں موجود ہونا چاہیے یا نہیں مگر میں ذاتی طور پر جہازوں کو وہاں رکھنے کو ترجیح دیتا ہوں۔
ادھر جی 7 میں شامل ممالک نے مطالبہ کیا ہے کہ اسرائیل اور حماس کے درمیان جاری جنگ کو روکا جائے تاکہ امداد سامان بھیجنے اور مغویوں کی بازیابی کیلیے اقدامات اٹھائیں جائیں۔
