غزہ: اسرائیلی حملوں سے خوفزدہ بچوں میں جنگی جہازوں کا خوف کم کرنے کیلئے فلسطینی لڑکی کی میوزک بجانے کی ویڈیو وائرل ہوگئی۔
اسرائیل کی غزہ میں بربریت کی وجہ سے لاکھوں فلسطینی بے گھر ہوچکے ہیں جو اپنی جانیں بچانے کے لیے مختلف علاقوں میں خانہ بدوشی کی زندگی گزارنے پر مجبور ہیں۔
غزہ میں سر پر ہر وقت اڑتے جنگی جہازوں کی گھن گرج نے بچوں کے دلوں میں خوف پیدا کررکھا ہے، ایسے میں پناہ گزینوں کے کیمپ رفح میں ایک لڑکی ایسی بھی ہے جو بچوں کے مرجھائے چہروں پر مسکراہٹ بکھیر رہی ہے۔
رویا حسونہ مشرقی وسطی میں بجائے جانے والے گٹار نما میوزک انسٹرومنٹ اوڈ کی ماہر ہیں اور وہ اپنے اس فن سے بچوں میں جنگی جہازوں کا شور اور اس کے خوف کو کم کرنے کی کوشش کررہی ہیں۔
رویا کی یہ ویڈیو عالمی میڈیا کے ساتھ ساتھ سوشل میڈیا پر بھی زیر گردش ہے جس میں انہیں بچوں کے درمیان بیٹھے دیکھا جاسکتا ہے جب کہ بچے بھی گانا گا کر موسیقی سے محظوظ ہورہے ہیں۔
میڈیا کو انٹرویو دیتے ہوئے رویا کا کہنا تھا کہ کوئی بھی بچہ میرے میوزک سے لطف اٹھا سکتا ہے اور میرا خیال ہے کہ جنگی جہازوں کا شور کم کرنے کیلئے میں یہ سب سے اچھی چیز کررہی ہوں کیونکہ موسیقی کے وقت بچے جہازوں کا شور بھول جاتے ہیں اور میرے ساتھ اوڈ کی تال پر گانا گاتے ہیں۔
