سوشل میڈیا کمپنی میٹا کے مالک مارک زکربرگ نے سونے کا ہار پہننے سے متعلق سوشل میڈیا میں چہ مگوئیوں کے بعد سونے کے ہار کے پیچھے چھپا راز آشکار کردیا۔
مارک زکربرگ کی جانب سے انسٹاگرام کی ایک ویڈیو کے بعد سوشل میڈیا پر ان کے سونے کے ہار پر تبصرے ہو رہے ہیں تاہم انہوں نے وضاحت بھی دے دی ہے۔
قبل ازیں مارک زکربرگ کو جب ہار پہنے ہوئے دیکھا گیا تھا تو انہوں نے کہا تھا کہ وہ ڈیزائن کے عمل کے حصے کے طور پر جائزہ لے رہے ہیں اور سونے کے ہار کے ساتھ ان کا جذباتی لگاؤ ہے۔
مارک زکربرگ نے بتایا کہ سونے کے ہار میں وہ دعا کندہ ہے جو وہ اپنی بیٹیوں کے لیے گنگناتے رہتے ہیں۔
انہوں نے کہا کہ میں یہ دعا اپنی بیٹیوں کے لیے اس وقت پڑھتا ہوں جب میں ان کو سلانے کی کوشش کرتا ہوں، یہ دعا ‘می شیبیراک’ کہلاتی ہے جو صحت اور بہادری کے لیے ہے اور یہ دعا یہودیوں سے منسوب ہے اور اس کا مطلب ہے کہ ہمیں اپنی زندگیاں آسان بنانے کا حوصلہ ملے۔
مارک زکربرگ نے وضاحت کی کہ یہ دعا میں اپنی بیٹیوں کے لیے جب سے وہ پیدا ہوئی ہیں ہر رات پڑھتا ہوں، میں سونے کے وقت ان کے قریب رہنے کی کوشش کرتا ہوں، جب میں اپنے بچوں کے ساتھ ہوں تو میرے اور میرے خاندان کے لیے یہ بڑی اہمیت ہوتی ہے۔
میٹا کے سربراہ کی اس وضاحت کے بعد سوشل میڈیا پر صارفین نے سونے کے ہار کے پیچھے چھپے راز کو سراہا اور کہا کہ وہ اپنی ذاتی زندگی کے حوالے سے عام لوگوں کو آگاہ کر رہے ہیں اور اس سے ہمیں پتا چلتا ہے کہ وہ ایک عظیم انسان ہیں۔
ایک اور صارف نے لکھا کہ اگر میں ارب پتی ہوتا تو شاید میں ممکنہ طور پر بہت سی اچھے کام کرتا تو کیوں نہیں، تیسرے شخص نے دعائیہ کلمات ادا کرنے کی بات کی خوب ستائش کی۔
