گزشتہ دنوں نازیبا ویڈیو لیک ہونے والی ٹک ٹاکر مناہل ملک نے سوشل میڈیا کو خیر آباد کرنے کا اعلان کر دیا۔
اپنے ایک جذباتی پیغام میں ٹک ٹاکرنے کہا ہے کہ وہ سوشل میڈیا کو ہمیشہ کیلئے خیرباد کہہ رہی ہیں۔ ان کا کہنا تھا کہ میں نے بہت سوچ سمجھ کر یہ فیصلہ لیا ہے آپ لوگوں نے جو سپورٹ اور پیار دیا میں اس کیلئے سب کی شکرگزار ہوں، لیکن یہ دنیا کسی بھی حال میں جینے نہیں دیتی دنیا بہت ظالم ہے، امید ہے کہ اب آپ کو اپنا چہرہ نہیں دکھاؤں گی۔
میں اپنے مداحوں سے معافی مانگتی ہوں، میں لوگوں کے رویوں سے تنگ آ چکی ہوں اور خود کو بہت بے بس محسوس کر رہی ہوں میں اندر سے مرچکی ہوں۔
مناہل ملک نے انسٹاگرام اسٹوریز میں تنقید کرنے والوں کو مشورہ دیا کہ وہ اپنے ارد گرد نفرت پھیلانا چھوڑدیں۔ اپنے مداحوں سے معافی مانگتے ہوئے مزید لکھا کہ یہ زندگی بہت مختصر ہے، معلوم نہیں مہلت ملے نہ ملے اپنوں کے ساتھ زیادہ سے زیادہ وقت گزاریں اور غلطی کرنے والوں کو معاف کردیا کریں۔
یاد رہے کہ گزشتہ ہفتے مناہل ملک کی مبینہ نازیبا ویڈیوز لیک ہوئی تھیں جس پر مناہل نے ایک ویڈیو پیغام میں دعویٰ کیا تھا کہ ویڈیوز جعلی اور ایڈٹ شدہ ہیں۔ ان کی ویڈیوز کو اے آئی کے ذریعے بنا کرکے پھیلایا گیا ہے۔ ٹک ٹاکر نے کہاتھا کہ ویڈیو کے بعد سے میں اور میری فیملی ڈپریشن میں ہے، ہمیں پتہ ہے کہ ہم پر کیا گزر رہی ہے۔
تاہم سوشل میڈیا صارفین اور بعض شوبز شخصیات کی جانب سے یہ دعویٰ کیا گیا تھا کہ ٹک ٹاکر نے سستی شہرت حاصل کرنے کیلئے اپنی ویڈیوز خود وائرل کی ہیں۔
