بھارت میں ایک ریلی کے دوران بالی وڈ کے سینئر اداکار متھن چکرورتی کی جیب کٹ گئی۔
بھارتی میڈیا کے مطابق متھن #چکرورتی گزشتہ روز ریاست جھارکنڈ کے دھنباد ضلع میں بی جے پی امیدوار کے لیے نکالی گئی ریلی میں شریک تھے جس دوران کسی جیب کترے نے ان کا پرس چرالیا۔
بھارتی میڈیا کا بتانا ہے کہ ریلی میں بڑی تعداد میں لوگ متھن چکرورتی کی ایک جھلک دیکھنے کیلئے شریک ہوئے تھے لیکن بدقسمتی سے اسی دوران اسٹیج پر جاتے ہوئے متھن چکرورتی کا پرس چوری ہوگیا۔
سینئر اداکار کا پرس چوری ہونے کی اطلاع ملتے ہی ریلی کے شرکا میں ہلچل مچ گئی، اسی دوران اسٹیج سے بھی بار بار مائیک کے ذریعے چور سے متھن چکرورتی کا پرس واپس کرنے کی اپیل کی گئی لیکن تمام تر کوششوں کے باوجود اداکار کا پرس نہ مل سکا۔
بھارتی میڈیا کا بتانا ہے کہ پرس چوری ہوجانے کے بعد متھن چکرورتی بھی مایوس ہوگئے اور وقت سے پہلے ہی ریلی چھوڑ کر چلےگئے۔
