اسلام آباد:
انسداد دہشت گردی کی عدالت نے ڈی چوک سے گرفتار 17 مظاہرین کو ایک روزہ جسمانی ریمانڈ پر پولیس کے حوالے کردیا۔
اسلام آباد کی انسداد دہشت گردی عدالت میں ڈی چوک میں احتجاج کے دوران گرفتار 17 مظاہرین عدالت میں پیش کردیے گئے۔ تھانہ سیکریٹریٹ پولیس نے ملزمان کو انسداد دہشتگردی عدالت کے جج طاہر عباس سپرا کے روبرو پیش کیا۔
پراسیکیوٹر راجہ نوید نے کہا کہ میں اس میں ایک درخواست کروں گا کہ گزشتہ ریمانڈ پر تاریخ غلط لکھی گئی ہے۔
جج طاہر عباس سپرا نے کہا کہ میں نے تین دن کا ریمانڈ دیا تھا چار دن کا لکھا گیا، ایک دن کا ریمانڈ دیتا ہوں صبح دیکھیں گے جوڈیشل کرنا ہے یا مزید ریمانڈ دینا ہے۔
جج نے پوچھا کہ پولیس نے ملزمان سے کیا برآمدگی کی ہے؟ کیا 17 کے 17 بندے پورے ہیں؟ اس پر پراسیکیوٹر نے کہا پورے ہیں۔
بعدازاں عدالت نے ملزمان کو ایک روزہ جسمانی ریمانڈ پر سیکریٹریٹ پولیس کے حوالے کر دیا۔
