حال ہی میں مرغیوں کو پالنا شروع کرنے والی ایک خاتون اس وقت دنگ رہ گئی جب ایک مرغی نے معمول سے دوگنا بڑا انڈا دیا۔
جب خاتون نے اس انڈے کو توڑ کر کھولا تو مزید دنگ رہ گئی کیونکہ چھلکے کے اندر ایک اور عام حجم کا ثابت انڈا موجود تھا۔
نائیلی ٹیٹ نامی خاتون امریکی ریاست الینواس سے تعلق رکھتی ہیں اور 2024 سے مرغیوں کو پال رہی ہیں۔
انہوں نے ایک انٹرویو میں بتایا کہ 'مرغیوں سے محبت کی وجہ میری دادی ہیں، جو میرے بچپن سے مرغیوں کو پال رہی ہیں اور میں نے ان سے ہی اس بارے میں سب کچھ سیکھا'۔
گزشتہ دنوں وہ اپنی مرغیوں کو دیکھنے گئی تھیں اور وہاں کچھ ایسا دریافت کیا جو انہوں نے پہلے کبھی نہیں دیکھا تھا۔
کسی مرغی نے بہت بڑا انڈا دیا تھا جس کی تصاویر انہوں نے سوشل میڈیا پر بھی پوسٹ کیں۔
ایک تصویر میں نظر آرہا تھا کہ وہ انڈا ان کی ہتھیلی سے بھی بڑا تھا۔
انہوں نے بتایا کہ 'آخرکار میں نے اسے توڑنے کا فیصلہ کیا اور جو نظارہ نظر آیا وہ بھی میں پہلے کبھی نہیں دیکھا تھا'۔
تصاویر سے معلوم ہوتا ہے کہ جب انڈا توڑ گیا تو اس کے اندر ایک اور انڈا چھپا ہوا تھا اور جب دوسرے انڈے کو توڑا گیا تو اس کے معمول کے مطابق زردی اور سفیدی موجود تھی۔
