پاکستان کی معروف سینئر اداکارہ فضیلہ قاضی نے قیصر نظامانی سے پہلی ملاقات اور ان کی شادی تک کے سفر کی دلچسپ کہانی سنائی۔ نجی ٹی وی کے شو میں شرکت کے دوران فضیلہ قاضی سے سوال کیا گیا کہ قیصر نظامانی نے انہیں شادی کے لیے کیسے قائل کیا تھا اور ان کی پہلی ملاقات کہاں ہوئی؟
فضیلہ قاضی نے بتایا کہ ہم پاکستان ٹیلی ویژن کے کوریڈورز میں ملے۔ شروع میں قیصر سندھی ڈراموں میں کام کرتے تھے اور بعد میں اردو ڈراموں کی طرف آئے۔ میری امی کو قیصر کافی پسند تھے اور وہ خاص طور پر ان کے ڈرامے دیکھتی تھیں۔ انہوں نے مجھ سے کہا کہ ایک نیا ہیرو آیا ہے، مجھے ملواؤ، بہت پسند ہے مجھے۔
فضیلہ قاضی نے مزید بتایا کہ ایک شو پر ملنے کے بعد قیصر مجھے پھول دیا کرتے تھے اور اکثر میرے گھر آجاتے تھے۔ ایک دن میں نے ان سے کہا کہ جو آپ میرے پیچھے پیچھے پھرتے ہیں، یہ مناسب نہیں ہے۔ میرے بابا نے بڑی مشکل سے ڈراموں میں کام کرنے کی اجازت دی تھی۔
پھر قیصر نے کہا کہ آپ مجھے اچھی لگتی ہیں۔ اس پر میں نے کہا کہ آپ رشتہ بھجوائیں تو ہم شادی کرلیں گے۔ سینئر اداکارہ نے بتایا کہ مجھے لگا تھا کہ قیصر انکار کردیں گے، لیکن ایسا نہیں ہوا۔ انہوں نے کہا ٹھیک ہے، لیکن ان کے والدین شادی پر رضامند نہیں تھے۔ قیصر نے کہا کہ پھر بھی میں شادی یہیں کروں گا۔
فضیلہ قاضی نے مزید بتایا کہ قیصر کے گھر والوں نے کہا ابھی تم کما رہے ہو، کیرئیر کی شروعات ہے، لیکن قیصر نے کہا کہ میں زبان دے چکا ہوں۔
