لاہور : صوبائی دارالحکومت لاہور کے علاقے مناواں میں افسوسناک واقعہ پیش آیا جہاں ایک 18 سالہ نوجوان دکاندار کے مبینہ تشدد کے باعث زندگی کی بازی ہار گیا۔
پولیس کے مطابق نوجوان نے عید پر معمول سے زیادہ چھٹیاں کیں جس پر دکان کے مالک نے اسے بدترین تشدد کا نشانہ بنایا۔ تشدد کی شدت ایسی تھی کہ نوجوان زخموں کی تاب نہ لاتے ہوئے دم توڑ گیا۔
واقعے کے فوراً بعد پولیس نے کارروائی کرتے ہوئے ملزم دکاندار کو گرفتار کر لیا اور اس کے خلاف مقدمہ درج کر لیا گیا ہے۔
ادھر اسی علاقے مناواں میں ایک اور واقعے میں فائرنگ سے ایک کانسٹیبل زخمی ہو گیا۔ زخمی اہلکار کو فوری طبی امداد کے لیے اسپتال منتقل کر دیا گیا ہے جبکہ فائرنگ کے واقعے کی تفتیش جاری ہے۔
