امریکا کی پرڈیو یونیورسٹی کے انجینئرنگ طلبا نے ایک حیرت انگیز کامیابی حاصل کی ہے، جس کے تحت ان کے تیار کردہ روبوٹ نے صرف 0.103 سیکنڈ میں روبک کیوب حل کر کے نیا گنیز ورلڈ ریکارڈ قائم کیا۔
یہ وقت انسانی آنکھ کی جھپک سے بھی تیز ہے، جو عام طور پر 200 سے 300 ملی سیکنڈ میں ہوتی ہے۔
روبوٹ کا نام “پرڈوبکزکیوب Purdubik’s Cube “ رکھا گیا ہے، اور یہ پرڈیو یونیورسٹی کے الیکٹریکل اور کمپیوٹر انجینئرنگ کے طلباء جونپی اوتا، ایڈن ہرڈ، میتھیو پیٹرو اور الیکس برٹا نے تیار کیا ہے۔
اس روبوٹ نے مئی 2024 میں جاپانی کمپنی مٹسوبیشی الیکٹرک کے قائم کردہ 0.305 سیکنڈ کے ریکارڈ کو تقریباً تین گنا تیز رفتار سے توڑا ہے۔
یہ روبوٹ جدید موٹرز اور سینسرز کے استعمال سے بے مثال رفتار کے ساتھ روبک کیوب کے تمام پہلوؤں کو فوری طور پر اسکین کر کے حل نکالتا ہے۔
اس کامیابی کا سہرا پرڈیو یونیورسٹی کے طلبا کی مشترکہ محنت اور جدید ٹیکنالوجی کے استعمال کو جاتا ہے۔
یہ نیا ریکارڈ روبک کیوب حل کرنے کی ٹیکنالوجی میں ایک بڑی پیش رفت ہے، جو انجینئرنگ کی دنیا میں ایک سنگ میل ثابت ہو گا۔
