دنیا کے امیر ترین شخص ایلون مسک کی کمپنی ٹیسلا کے آپٹیمس روبوٹ نے انسانوں کی طرح رقص کر کے سب کو حیران کر دیا۔
ٹیسلا کے سی ای او ایلون مسک نے اپنے جدید ترین آپٹیمس ہیومنائیڈ روبوٹ کی ایک نئی ویڈیو شیئر کی، جس میں روبوٹ انسانی انداز میں اپنے ہاتھ اور پاؤں کو حرکت دیتے ہوئے مہارت سے رقص کر رہا ہے۔
یہ ویڈیو سوشل میڈیا پلیٹ فارم ایکس پر پوسٹ کی گئی، جہاں دیکھنے والے حیرت میں مبتلا ہو گئے۔
آپٹیمس کے انجینئر میلان کوواک نے ایلون مسک کی پوسٹ کو دوبارہ شیئر کرتے ہوئے لکھا کہ "مزید جلد آرہا ہے، ٹیم پس منظر میں انتھک محنت کر رہی ہے۔"
انہوں نے مزید وضاحت کی کہ روبوٹ کو مکمل طور پر ری انفورسمنٹ لرننگ کے ذریعے تربیت دی گئی ہے، جو ایک ایسی تکنیک ہے جس میں مصنوعی ذہانت آزمائش اور غلطی کے ذریعے مجازی ماحول میں سیکھتی ہے۔
ایلون مسک نے ایک بیان میں کہا کہ وہ 2025 کے آخر تک ہزاروں آپٹیمس روبوٹ تیار کرنے کا ارادہ رکھتے ہیں۔
