پنجاب میں خطے کی سب سے بڑی اور جدید ترین کلائمیٹ آبزرویٹری کے قیام کی منظوری دے دی گئی ہے، جس کا مقصد موسمیاتی تبدیلیوں سے متعلق بروقت معلومات فراہم کرنا اور سائنسی تحقیق کو فروغ دینا ہے۔
وزیراعلیٰ پنجاب مریم نواز شریف نے اس منصوبے کی باضابطہ منظوری دی، جس کے تحت ایک جدید سائنسی مرکز بھی قائم کیا جائے گا تاکہ موسمیاتی تجزیہ اور پالیسی سازی میں معاونت فراہم کی جا سکے۔
سینئر وزیر پنجاب مریم اورنگزیب کی زیر صدارت ایک اعلیٰ سطحی اجلاس میں آبزرویٹری کے قیام، بجٹ، آلات، اور زمین کی فراہمی سے متعلق فزیبلٹی پلان کی منظوری دی گئی۔ اجلاس میں یونیورسٹی آف انجینئرنگ اینڈ ٹیکنالوجی (یو ای ٹی) لاہور کی جانب سے پیش کی گئی رپورٹ کا بھی جائزہ لیا گیا۔
کلائمیٹ آبزرویٹری پنجاب پلاننگ اینڈ ڈیولپمنٹ ہاؤس میں قائم کی جائے گی، جبکہ اس کا مرکزی ڈھانچہ ای آئی سی ٹی (EICT) میں تعمیر ہوگا۔ اس میں جدید خودکار کمیونیکیشن اور لنکج سسٹم، جی آئی ایس لیب، سیکٹورل انٹرفیس سسٹم، اور جدید ڈیٹا ہب شامل ہوں گے۔
ماحولیاتی ماہرین کی تیاری کے لیے ایک انٹرنشپ پروگرام بھی شروع کیا جائے گا، جبکہ ادارے کو جدید ترین مینجمنٹ ماڈل کے تحت چلایا جائے گا اور عالمی معیار کا پروفیشنل اسٹاف بھرتی کیا جائے گا۔
اجلاس میں ڈیٹا آرکائیو سسٹم، کوآرڈینیشن یونٹ، اور انٹرنیشنل کمیونیکیشن سیل کے قیام کی منظوری بھی دی گئی، تاکہ موسمیاتی تبدیلیوں کے خطرات کی بروقت پیشگوئی اور تجزیہ ممکن ہو سکے۔
سینئر وزیر مریم اورنگزیب نے کہا کہ وزیراعلیٰ مریم نواز شریف نے ماحولیاتی تحفظ کے لیے ایک جامع اور مربوط پلان دیا ہے، اور یہ آبزرویٹری سائنسی تحقیق اور بین الاقوامی معلومات کے تبادلے میں اہم کردار ادا کرے گی
