ترجمان پاک فوج لیفٹیننٹ جنرل احمد شریف چوہدری نے خبردار کیا ہے کہ اگر بھارت سندھ طاس معاہدے کی خلاف ورزی کرتا ہے، تو آزادیٔ کشمیر کے بعد 6 دریا پاکستان کے ہوں گے۔
قطر کے نشریاتی ادارے الجزیرہ کو دیے گئے انٹرویو میں انہوں نے کہا کہ پاکستانی مسلح افواج نے بھارتی فوج کو ایسا سبق سکھایا ہے جو وہ کبھی نہیں بھولیں گے۔
انہوں نے مزید کہا کہ بھارتی حملے کا مقابلہ کرنے کے لیے اپنائی گئی عسکری حکمت عملی آئندہ کئی دہائیوں تک زیرِ مطالعہ رہے گی۔
ڈی جی آئی ایس پی آر نے کہا کہ پاکستانی فوج نے بھارت پر برتری حاصل کر لی ہے اور حالیہ حملے میں بھارت کو اپنے مقاصد حاصل کرنے سے روک دیا گیا ہے۔
انہوں نے مزید کہا کہ پاکستانی عوام کے دلوں میں فوج کی محبت مزید بڑھ گئی ہے اور اب فوج عزت اور فخر کی علامت بن چکی ہے۔
