قبائلی ضلع باجوڑ کی تحصیل سلارزئی کے علاقے مانو سلارزئی میں جمعہ اور ہفتے کی درمیانی شب نامعلوم شرپسندوں نے پولیس کی ایک خالی چوکی کو بارودی مواد سے نشانہ بنا ڈالا۔ دھماکے کے نتیجے میں پوسٹ کا کمرہ مکمل طور پر تباہ ہو گیا، تاہم کوئی جانی نقصان نہیں ہوا کیونکہ اس وقت وہاں کوئی اہلکار موجود نہیں تھا۔
پولیس کے مطابق دھماکے کے بعد علاقے میں خوف و ہراس پھیل گیا۔ مقامی شہریوں نے واقعے کے بعد رات بھر شدید تشویش کا اظہار کیا۔
ڈی پی او باجوڑ قاص رفیق نے میڈیا سے بات کرتے ہوئے کہا کہ پولیس نے واقعے کی تحقیقات شروع کر دی ہیں اور شرپسندوں کو جلد قانون کے کٹہرے میں لایا جائے گا۔
پولیس کا کہنا ہے کہ حملہ آوروں کا سراغ لگانے کے لیے شواہد اکٹھے کیے جا رہے ہیں اور علاقے میں سیکیورٹی مزید سخت کر دی گئی ہے۔
