وفاقی تحقیقاتی ایجنسی (ایف آئی اے) پشاور نے خاتون افسر کے خلاف دہری ملازمت اور مالی دھوکا دینے پر مقدمہ درج کر لیا۔
ایف آئی اے کے ترجمان کے مطابق خاتون افسر حاجرہ سرور کے پاس بیک وقت الگ الگ ڈپارٹمنٹ میں 2 عہدے ہیں۔
ایف آئی اے کا کہنا ہے کہ حاجرہ سرور افغان مہاجرین کمشنریٹ خیبر پختونخوا میں ڈپٹی ڈائریکٹر ہیں، حاجرہ سرور پاکستان ویمن کرکٹ ٹیم کی کوچ بھی ہیں۔
ایف آئی اے کے ترجمان کے مطابق ملزمہ نے2001ء سے2008ء اور 2017ء سے اب تک مالی فوائد حاصل کیے، ملزمہ کا نام اسٹاپ لسٹ میں شامل کر دیا گیا ہے۔
ایف آئی اے کے ترجمان کا کہنا ہے کہ ملزمہ برطانیہ فرار ہو گئیں ہیں، وطن واپسی پر فوری گرفتاری ہو گی، ملزمہ کی جائیداد اور بینک اکاؤنٹس منجمد کرنےکی کارروائی شروع کردی گئی ہے۔
