وزیراعظم عمران خان نے ملک میں گیس کی بدترین لوڈشیڈنگ کی شکایت کا نوٹس لیتے ہوئےمعاملے پر حکام سے بریفنگ لینے کے لیے توانائی کے امور پر اجلاس طلب کر لیا ہے۔
اجلاس میں وفاقی وزراء، معاونین خصوصی، مشیران اور سیکرٹریز شریک ہوں گے جس میں وزیراعظم کو گیس کی موجودہ صورتحال پر بریفنگ دی جائے گی۔
گیس کی قلت پر قابو پانے کے لیے اقدامات سے وزیراعظم کو آگاہ کیا جائے گا، توانائی شعبے میں کی جانے والی اصلاحات پر بھی وزیراعظم کو بریفنگ دی جائے گی۔
قبل ازیں وزیرِ اعظم عمران خان سے مشیر پارلیمانی امور بابر اعوان نے ملاقات کی جس میں آئینی، قانونی اور سیاسی امور پر گفتگو ہوئی۔
وزیراعظم عمران خان نے جمہوریت کی مضبوطی کیلئے اداروں کے مضبوط ہونے کو اہم قرار دیتے ہوئے کہا کہ اداروں پر اپنی سیاست چمکانے کیلئے انگلیاں اٹھانے والے کسی قیمت جمہوریت کے علمبردار نہیں ہو سکتے، ریاست کے تمام ستون اپنے دائرہ کار میں رہ کر ملکی ترقی کیلئے کام کر رہے ہیں۔
بابر اعوان نے معاشی استحکام اور کورونا سے بچاؤ کی حکومتی پالیسیوں کو حکومت کی اہم کامیابیاں قرار دیتے ہوئے کہا کہ اندھیرے فروشوں کا پاکستان میں اب کوئی مستقبل نہیں۔
