سوشل میڈیا صارفین کے لیے اب ایسا پلیٹ فارم متعارف کرایا گیا ہے جہاں سماجی رابطوں کی مختلف ویب سائٹس کی میسجنگ سروس ایک جگہ ہوگی۔
ایک ایسی یونیورسل ایپ تیار کی گئی ہے جو آئی میسج اور دیگر میسجنگ ایپلی کیشنز کو ایک جگہ اکٹھا کرے گی، اور ایک پلیٹ فارم پر رہتے ہوئے تمام میسجنگ سروس کا فائدہ اٹھایا جاسکے گا، پیبل نامی کمپنی کے بانی ایرک مگسوکوی نے یہ ایپ تیار کی ہے جس کا نام بیپر رکھا گیا ہے۔
برسوں پہلے مختلف سافٹ ویئرز ہوا کرتے تھے جہاں سے اس طرح کی سہولتیں ملتی تھیں۔ ماضی میں صارفین کو مختلف انسٹنٹ میسجنگ نیٹ ورکس جیسے یاہو اور ایم ایس این کو بیک وقت استعمال کرنے کی سہولت دی گئی تھی۔ تاہم اب دوبارہ یہ تصور عام ہورہا ہے اور لوگوں کو ایک پلیٹ فارم ملے گا۔
بیپر ایپلی کیشن میں صارفین پندرہ مختلف میسجنگ سروسز بشمول واٹس ایپ، سگنل، ٹیلیگرام، انسٹاگرام، ٹوئٹر ڈائریکٹ میسجز، میسنجر، اسکائپ، ہینگ آوٹ اور دیگر سے منسلک ہوسکتے ہیں۔
کمپنی کے بانی ایرک مگسوکوی کا کہنا ہے کہ ہمارے لیے سب سے مشکل آئی میسج کو اس پلیٹ فارم پر لانا تھا تاکہ اسے اینڈرائیڈ اور ونڈروز پلیٹ فارمز کے لیے فراہم کرسکیں، کیوں کہ آئی میسج کا کوئی اے پی آئی نہیں ہے، یہ نئی ایپ میٹرکس پر مبنی ہے، جو اوپن سورس انکرپٹڈ میسجنگ پروٹوکول ہے۔
