کراچی: فالودے اور پاپڑ والے کے بعد اب چوکیدار کے نام پر بھی بے نامی لگژری گاڑیاں رجسٹر ہونے کا ہوشربا انکشاف ہوا ہے۔
تفصیلات کے مطابق ایف بی آر بے نامی زون میں چوکیدار کے نام پر 10 سے زائدگاڑیاں سامنے آگئی ہیں،چوکیدار کراچی کا رہائشی ہے۔
ایف بی آر زون کے مطابق کراچی کے ایک چوکیدار کے نام پر دس گاڑیاں سامنے آئی ہیں، اس معاملے میں کار ڈیلر کا نام بھی بے نامی گاڑیوں میں استعمال ہوا ہے۔
ایف بی آر نے معاملے کی تحقیقات کا آغاز کرتے ہوئے چوکیدار اور کار ڈیلرکو نوٹسز جاری کردئیے ہیں۔
اس کے علاوہ ایف بی آر بے نامی زون نے چوکیدار سے دیگر ضروری دستاویز طلب کرلی ہیں، دستاویز کی عدم فراہمی پر بے نامی ایکٹ کے تحت قانونی کارروائی ہوگی۔
واضح رہے کہ اس سے قبل ایف بی آر نے جعلی بینک اکاونٹس کیس میں کراچی میں پاپڑ والے اور فالودے والے کے اکاؤنٹس سے اربوں روپے کی غیر قانونی ٹرانزیکشن کا سراغ لگایا تھا۔
